दार्चुला । नेकपा (एमाले) दार्चुलाका संस्थापक नेता तथा तत्कालीन केन्द्रीय अनुशासन आयोगका सदस्य वीर बहादुर ठगुन्नाकाे पाँचौ स्मृति दिवस खलंगामा मनाइएको छ।

दार्चुला सदरमुकाम खलंगास्थित एमाले पार्टी कार्यालयमा ठगुन्नाको स्मृति दिवस मनाइएको हो । दिवसका अवसरमा एमाले पोलिटब्युरो सदस्य गणेशसिंह ठगुन्नासहित दार्चुलाका नेताहरूले स्वर्गीय वीरबहादुर ठगुन्नाको फोटोमा माल्यार्पण गरी श्रद्धासुमन व्यक्त गरेको जिल्ला कमिटी अध्यक्ष ज्ञानेन्द्र घर्तीले बताउनुभयो। दार्चुलामा कम्युनिस्ट आन्दोलन अगाडि बढाउन महत्त्वपूर्ण भूमिका निर्वाह गर्नुभएका ठगुन्नाको सम्झना गर्दै उहाँको योगदानको उच्च प्रसंसा गरिएको उहाँले बताउनुभयो।

दार्चुलाको नौगाड गाउँपालिका–२ खार सुण्डमुण्डमा जन्मिनुभएका ठगुन्नाको क्यान्सर रोगका कारण उपचारको क्रममा काठमाडौंमा निधन भएको थियो। वि.सं. २०१० साल फागुन ३ गते जन्मिएका नेता ठगुन्ना २०३० सालदेखि नै कम्युनिष्ट आन्दोलनमा सक्रिय हुनुभएको थियो। २०३५ देखि अनेरास्ववियुमा आबद्ध हुनुभएका ठगुन्ना २०३७ असोजदेखि नेकपा मालेमा आबद्ध रहदै २०४७ असार १२ देखि नेकपा इकाई कमिटी बझाङको बुंगल क्षेत्र सचिव रहनुभएको थियो ।

२०४७ सालमा तत्कालिन नेकपा एमाले दार्चुलाको पार्टी सचिव हुनुभएको थियो । उहाँले तीन कार्यकाल दार्चुला जिल्लामा नेकपा एमाले पार्टी सचिव भई कम्युनिष्ट आन्दोलनको अगुवाइ गर्नुभएको थियो । त्रिभुवन विश्वविद्यालयबाट भूगोल विषयमा स्नातक सम्मको औपचारीक शिक्षा लिनुभएका नेता ठगुन्नाले निजामति सेवामा दुई वर्ष सेवा गर्नुभएको थियो । महादेव मावि अठपाली बझाङका संस्थापक प्रधानाध्यापक समेत रहनुभएका नेता ठगुन्नाले विद्यार्थी जीवनकालबाटै कम्युनिष्ट आन्दोलनमा होमिएपछि शिक्षक पेशालाई त्यागेर दार्चुला जिल्लामा कम्युनिष्ट आन्दोलन जन्माउनुभएको थियो ।

सरकारी जागिर त्यागेर कम्युनिष्ट आन्दोलनमा होमिएका उहाँ २०४८ सालको निर्वाचनमा जिल्लाबाट सांसद पदमा उम्मेदवार बन्नुभएको थियो । २०५१ सालको मध्यावधि चुनावमा राष्ट्रबादी नेता स्वर्गिय प्रेमसिंह धामीलाई जिताउन सहयोग गर्नुभएको थियो ।
२०४९ सालमा जिल्ला विकास समिति सदस्यमा निर्वाचित हुदै २०५४ सालमा जिल्ला विकास समिति उपसभापतिमा निर्वाचित हुनुभएको थियो । २०५१ सालमा सुकुम्बासी आयोगका जिल्ला अध्यक्ष समेत बनेका नेता ठगुन्ना २०५६ सालमा जिल्लाबाट कम्युनिष्ट पार्टीको सांसद पदमा उम्मेदवार बन्नुभएको थियो । २०४८ सालमा राप्रपा नेता अगवर बहादुर सिह र २०५६ सालमा नेपाली काग्रेशका नेता दिलेन्द्र प्रसाद बडूसंग पराजित हुनुभएको थियो ।
केपी शर्मा ओली पहिलो पटक प्रधानमन्त्री हुदा २०७१ सालमा समाज कल्याण परिषदको कोषाध्यक्ष बन्नुभएको थियो।

दुई पटक सांसद पदमा उम्मेदवार बनेका ठगुन्नाले २०६४ सालको संविधानसभा र २०७० सालको प्रतिनिधिसभा निर्वाचनमा तत्कालिन नेकपा एमालेको तर्फबाट उम्मेदवार रहनुभएका गणेशसिंह ठगुन्नालाई सघाउनुभएको थियो । नेता ठगुन्नाले भारतले अतिक्रमण गरेको नेपाली भूमि लिम्पियाधुरा, लिपुलेक र कालापानीको मुद्दालाई निरन्तर उठाउनुभएको थियो । जननेता स्वर्गिय मदन भण्डारी, राष्ट्रबादी नेता स्वर्गिय प्रेमसिंह धामीसंगको नियमित सल्लाहपछि उहाँले कालापानीको स्थलगत भ्रमण समेत गर्नुभएको थियो ।

२०४८ सालमा दार्चुला पुगेका जननेता स्वर्गिय मदन भण्डारीसंग छलफल गरि कालापानीको स्थलगत भ्रमण पश्चात् पार्टीलाई प्रतिबेदन समेत बुझाउनुभएको थियो । उहाँले ‘कालापानी ओझेलमा, सीमाबासीका पीड’ जस्ता विभिन्न लेख रचनाहरु प्रकाशित गरेर सीमा समस्या र समाधानका उपायहरु पटकपटक उठाउदै आउनुभएको थियो । उहाँको निधनले दार्चुलाको कम्युनिस्ट आन्दोलनमा ठूलो क्षति पुगेको बताउदै स्मृति सभामा उपस्थित नेताहरूले उहाँको सपना पुरा गर्न सबैले लाग्नुपर्ने धारणा राखेका छन् ।

ठगुन्नाको निधन भएको समयमा लोकदर्पण टिभीले तयार गरेको संक्षिप्त जीवनीसहितको भिडियो हेर्न तलको लिंकमा जानुहोस्