दार्चुला । साबिक विजेता जनकपुर बोल्ट्सले नेपाल प्रिमियर लिग (एनपिएल) सिजन–२ मा पहिलो जित हात पारेको छ । लिगमा लगातार चार गुमाएको जनकपुरले पाँचौँ खेलमा चितवन राइनोजलाई ६ विकेटले हराउँदै पहिलो जित निकालेको छ ।
मंगलबार भएको खेलमा चितवनले दिएको लक्ष्य जनकपुरले १७.३ ओभरमा ६ विकेट गुमाएर पूरा गर्यो ।
उसका लागि अनिल साह र माज सदाकतले अर्धशतकीय पारी खेले । अनिलले ३६ बलमा चार चौका र तीन छक्काको मद्दतमा ६१ तथा माजले ३० बलमा ६ चौका चार छक्का प्रहार गर्दै ६३ रनको पारी खेलेका हुन् ।
यस्तै, आसिफ शेखले १८, जान निकोल लोफ्टी-इटनले ११ तथा आदित्य महताले अविजित १८ रनको योगदान दिए ।
चितवनका लागि बलिङमा सोहेल तनवीर, कमल सिंह ऐरी र अमर रौटेलाले एक-एक विकेट लिए ।
त्यसअघि, टस जितेर ब्याटिङ रोजेको चितवनले निर्धारित २० ओभरमा चार विकेट गुमाएर १ सय ७६ रन बनायो ।
उसका लागि ओपनिङ ब्याटर डेविड मलानले सानदार ब्याटिङ गरे । ५४ बलको सामना गरेका उनले चार चौका र पाँच छक्काको मद्दतमा ८० रन बनाए । एनपिएलमा मलानको यो पहिलो अर्धशतक हो ।
त्यस्तै, अर्जुन साउदले ५२ तथा कप्तान कुशल मल्लले ३० रन जोडे ।
जनकपुरका लागि बलिङमा रुपेश सिंह, माज सदाकत, अनिल साह र जान निकोल लोफ्टी-इटन एक/एक विकेट लिए ।
जनकपुरसँगको यो हारपछि चितवनको प्लेअफ सम्भावना कठिन बनेको छ । उसले अब प्लेअफमा स्थान बनाउने हो भने बाँकी दुई खेलमा लगातार जित निकाल्नुपर्छ ।
चितवनलाई हराएपछि जनकपुरले प्लेअफमा पुग्ने अंक गणितीय सम्भावना जीवितै राखेको छ ।
यो खबर पढेर तपाईलाई कस्तो महसुस भयो ?
भर्खरै प्रकाशित
प्रतिक्रिया