दार्चुला । जिल्ला अस्पताल बैतडीमा हाल सम्म बिरामीलाई रगत अभाव भयो भने सेना–प्रहरीलाई गुहारिनु पर्ने अवस्था रहेको थियो।
अब उक्त समस्यालाई मध्यनजर गर्दै जिल्ला अस्पतालमै ब्लड बैंक स्थापना गर्ने तीव्र तयारी भइरहेको छ। ब्लडबैंक स्थापना भएपछि जिल्लामा सहजै सुरक्षित र व्यवस्थित रूपमा रगत उपलब्ध हुने बैतडीका प्रमुख जिल्ला अधिकारी पुण्यविक्रम पौडेलले बताउनुभयो । रगत अभावका कारण उपचारमा समस्या देखिँदै आएकाले तत्काल प्रभावकारी व्यवस्था आवश्यक रहेको उहाँले बताउनुभयो ।
मिनी ब्लड बैंक सञ्चालनका लागि नेपाल रेडक्रस सोसाइटी शाखा बैतडी, दशरथचन्द नगरपालिका र जिल्ला अस्पताल बैतडीबिच जिम्मेवारी बाँडफाँट गरिएको छ। नगरपालिकाले आवश्यक जनशक्ति उपलब्ध गराउनेछ भने उनीहरूलाई तालिम तथा प्राविधिक स्रोत–साधन जिल्ला रेडक्रसले व्यवस्थापन गर्ने व्यवस्था मिलाइएको छ।
ब्लड बैंक सञ्चालनका लागि आवश्यक उपकरण, सामग्री र स्थान भने जिल्ला अस्पतालले उपलब्ध गराउने निर्णय गरिएको प्रमुख जिल्ला अधिकारी पौडेलले बताउनुभयो।
‘सम्बन्धित निकायले आफ्नो–आफ्नो जिम्मेवारी लिएको र केही दिनभित्र नै मिनी ब्लड बैंक सञ्चालनमा आउने गरी तयारी भइरहेको उहाँले बताउनुभयो। जिल्लामा नियमित, ब्लड सङ्कलन हुन थालेपछि खपत नहुने रगतलाई डडेल्धुरा, धनगढी र कञ्चनपुरका ब्लड बैंकमा पठाइने व्यवस्था मिलाइने पौडेलले बताउनुभयो। यसले रगत नष्ट हुने समस्या कम हुने र आन्तरिक सेवा प्रवाह सहज हुने अपेक्षा गरिएको छ।
यो खबर पढेर तपाईलाई कस्तो महसुस भयो ?
भर्खरै प्रकाशित
प्रतिक्रिया