दार्चुला । तत्कालको लागि दार्चुला जिल्ला कोरोनामुक्त बनेको छ ।
पछिल्लो पटक मार्मा गाउँपालिकाका चार जना कोरोना संक्रमित निको भएर घर फर्किएसंगै दार्चुला कोरोना सक्रिय संक्रमणमुक्त भएको स्वास्थ्य कार्यालय दार्चुलाले जनाएको छ ।
दार्चुला जिल्लाभर हालसम्म तीन सय २० जनामा कोरोना संक्रमण देखिएकामा सबैले कोरोना जितिसकेका छन् ।
सबैभन्दा बढी महाकाली नगरपालिकामा एक सय १९ जनामा कोरोना सक्रमण पुष्टि भएको थियो । मार्मा गाउँपालिकामा ५५ जना, शैल्यशिखर नगरपालिकामा १९ जना, दुहुँ गाउँपालिकामा १५ जना, व्यास र अपिहिमाल गाउँपालिकाका आठ आठ जना, मालिकार्जुन गाउँपालिकाका ७ जना र लेकम गाउँपालिकाका ५ जनामा कोरोना संक्रमण पुष्टि भएकोमा सबैले कोरोना जितिसकेका छन् ।
नौँगाड गाउँपालिकामा भने हालसम्म कोरोना संक्रमित फेला परेका थिएनन । यद्धपी नौगाड गाउँपालिका घर भइ जिल्ला बाहिर बस्दै आएका केहि मानिसलाई संक्रमण पुष्टि भएपनि डिस्चार्ज भइसकेका छन् ।
गत चैत्र २९ गते देखि हालसम्म दार्चुलाका नौ वटै स्थानीय तहबाट झण्डै ४ हजार मानिसको थ्रोट स्वाबको नमुना संकलन गरीएको थियो । हालसम्म जिल्ला भित्र संक्रमण पुष्टि भएका सबैले कोरोना जितिसकेका छन् ।
एक जना पुरुषको उपचारका लागि अस्पताल लैजादै गर्दा बैतडीको सतबाझँमा र दुई जनाको उपचारका क्रममा जिल्ला बाहिर मृत्यु भएको थियो ।
