दार्चुला । दार्चुलाको लेकम गाउँपालिकामा किशोरीसंग उपाध्यक्ष कार्यक्रम सम्पन्न भएको छ । लेकम गाउँपालिकाभित्रका १० वटै माध्यमिक विद्यालयबाट १०/१० जना गरि १०० जना किशोरीलाई बालविवाह नियन्त्रण सम्बन्धि अभिमुखीकरण र शैक्षिक सामग्री वितरण कार्य गरिएको लेकम गाउँपालिका महिला, बालबालिका तथा जेष्ठ नागरिक शाखा प्रमुख अधिकृत छैटौं शेखरचन्द्र ओझाले जानकारी दिनुभयो ।

तीन दिनसम्म सञ्चालन भएको कार्यक्रमको पहिलो दिन लेकम-५ मा अवस्थित लटिनाथ मावि चौपातामा वडा नम्बर १ को बडिपुर मावि सर्मोली, लेकम-५ को लटिनाथ मावि चौपाता र ऐडिबाग मावि मैखोली र वडा नम्बर ६ को मालिकार्जुन मावि तेलिगाउँ गरी चार वटा विद्यालयका ४० जना किशोरीलाई अभिमुखीकरण र शैक्षिक वितरण गरिएको थियो । दोस्रो दिन लेकम गाउँपालिकाको केन्द्र रातामाटामा हुनैनाथ मावि रातामाटा, गल्लाकेदार मावि खरकडा र कृष्ण मावि लालीबाट छनोट भएका ३० जना विद्यार्थी तथा किशोरीलाई शैक्षिक सामग्री वितरण र अभिमुखीकरण गरिएको थियो । यस्तै तेस्रो दिन शनिबार हुनैनाथ मावि कुणीमा मावि धरमघर, कुणी र गाडागाउँका ३० जना विद्यार्थी किशोरीलाई अभिमुखीकरणसहित शैक्षिक सामग्री वितरण गरिएको महिला बालबालिका शाखा प्रमुख ओझाले बताउनुभयो । तीन दिनसम्म चलेको कार्यक्रममा लेकमका १०० जना किशोरी विद्यार्थीलाई अभिमुखीकरण र शैक्षिक सामग्री वितरण गरिएको हो ।

लेकम गाउँपालिका उपाध्यक्ष माधवी जोशीको अध्यक्षतामा आयोजित कार्यक्रममा गाउँपालिका अध्यक्ष रामदत्त जोशीको प्रमुख आतिथ्यता रहेको थियो । जनप्रतिनिधि, कर्मचारी, शिक्षक, बुद्धिजीवी सहजकर्ता, विद्यालयहरूबाट छनोट भइ आएका विद्यार्थी लगायत सरोकारवालाहरूको उपस्थिति रहेको उक्त कार्यक्रममा २० वर्ष नपुग्दै हुने बिवाहका कारण, हानी तथा गलत प्रभाव, कानूनी प्रावधान र समाधानका विषयमा अभिमुखीकरण गरिएको छ । साथै विद्यार्थीलाई प्रोत्साहनस्वरूप कापी, कलम, झोला, छाता, क्यालकुलेटर, बोतल लगायत शैक्षिक सामग्री वितरण गरिएको लेकम गाउँपालिकाले जनाएको छ ।

कार्यक्रमका प्रशिक्षकहरूले बालविवाह गरेमा हुने शारीरिक, मानसिक र सामाजिक समस्या तथा नकारात्मक असर, कानूनी सजाय लगायत विषयमा प्रशिक्षण गर्नुभयो । अझैपनि आर्थिक समस्या, धर्म, परम्परा, जातीय मूल्य र लैङ्गिक भेदभाव लगायत कारणले बालविवाह हुने गरेकोले यसको रोकथामका लागि आफुबाट सुरू गरेर अरूलाई समेत सचेत पार्नुपर्नेमा जोड दिइएको छ ।

लेकम गाउँपालिका अध्यक्ष रामदत्त जोशीले किशोरीलाई हेर्ने गलत सामाजिक दृष्टिकोण परिवर्तन हुनुपर्ने बताउनुभयो । यो उमेरमा समाज, प्रविधि तथा सामाजिक सञ्जाल र गलत संगतका कारण बहकाउमा फस्ने जोखिम हुने भएकोले आफुलाई बलियो र सकारात्मक बनाउन सक्नुपर्ने सुझाव दिनुभयो । छोरीलाई बोँझको रूपमा लिने गलत सामाजिक परम्पराका कारण अझैपनि कतिपय किशोरीको सानै उमेरमा बिवाह हुने गरेको बताउदै उहाँले सबै सचेत हुनुपर्ने धारणा राख्नुभयो ।

लेकम गाउँपालिका उपाध्यक्ष माधवी जोशीले किशोरावस्था जोखिमपूर्ण समय भएकोले सकारात्मक सोचाइका साथ पढाइमा ध्यान दिनुपर्नेमा जोड दिनुभयो । यो समयमा सकारात्मक सोचका साथ भविष्य निर्माणमा केन्द्रीत हुनुपर्ने उहाँले बताउनुभयो । बालविवाहले शिक्षा, स्वास्थ्य, अधिकार र समग्र जीवनमा असर पार्ने भएकोले बालबालिका नियन्त्रण गर्न सबैले सचेत हुनुपर्ने उहाँको भनाइ छ । बालविवाह नियन्त्रणका लागि सबैले सचेत तथा जिम्मेवार बन्नुपर्नेमा सरोकारवालाहरूले जोड दिएका छन् ।