अमेरिकी जेफ्री एपस्टिनसँग सम्बन्धित गोप्य फाइलहरू सार्वजनिक भएपछि अमेरिकी न्याय विभाग गम्भीर विवादमा फसेको छ । एपस्टिनको यौन दुर्व्यवहारबाट पीडित महिलाले न्याय विभागको पछिल्लो कदमलाई कडा आलोचना गरेका बीबीसीले जनाएको छ ।

पीडितहरूको भनाइमा, सबै कानुनी रूपमा सार्वजनिक गर्नुपर्ने फाइलहरू नखोली अधुरो रूपमा कागजात सार्वजनिक गर्नु न्यायप्रति नै अन्याय हो । उनीहरूले सबै दोषी, सहयोगी र संलग्न व्यक्तिहरूको नाम सार्वजनिक नगरेसम्म यो प्रक्रिया पूरा भएको मान्न नसकिने बताएका छन् ।

न्याय विभागले हालै एपस्टिन काण्डसँग सम्बन्धित झण्डै ३० लाख पृष्ठका कागजात, एक लाख ८० हजार तस्बिर र झण्डै २ हजार भिडियो सार्वजनिक गरेको छ । तर तीमध्ये धेरैजसो कागजातमा महत्वपूर्ण जानकारी कालो मसीले छोपिएको आरोप लागेको छ, जसले पारदर्शितामाथि प्रश्न उठाएको हो ।

सार्वजनिक गरिएका नयाँ फाइलहरूमा अमेरिकी राष्ट्रपति डोनाल्ड ट्रम्पको नाम पनि धेरै ठाउँमा लेखिएको छ । तर न्याय विभागले ती आरोपहरूलाई प्रमाणविहीन र सनसनीपूर्ण भन्दै अस्वीकार गरेको छ । ह्वाइट हाउसले पनि राष्ट्रपति ट्रम्पमाथि लगाइएका सबै आरोपहरू पूर्ण रूपमा असत्य भएको दाबी गरेको छ । राष्ट्रपति ट्रम्पले एपस्टिनसँग सम्बन्धित कुनै पनि अपराधमा आफू संलग्न नरहेको कुरा पटक–पटक दोहोर्याउँदै आउनुभएको छ ।

यी फाइलहरूमा माइक्रोसफ्टका सह–संस्थापक बिल गेट्स, बेलायतका प्रिन्स एन्ड्र्यु, लेबर पार्टीका नेता पिटर म्यान्डेलसनलगायत विश्वका प्रभावशाली व्यक्तिहरूको नाम पनि उल्लेख छ । यसैबीच, डेमोक्र्याट सांसदहरूले न्याय विभागले झण्डै ६० लाख फाइलमध्ये आधा मात्र सार्वजनिक गरेको आरोप लगाएका छन् । उनीहरूका अनुसार यो कदम एपस्टिन फाइल पारदर्शिता ऐनको स्पष्ट उल्लङ्घन हो । हाउस ओभरसाइट कमिटीले सबै दोषी र अपराधमा संलग्न व्यक्तिहरूको नाम सार्वजनिक गर्न माग गरेको छ ।

न्याय विभागका उप–महान्यायाधिवक्ता टोड ब्लान्चले पीडितहरूको सुरक्षाका कारण फाइल सार्वजनिक गर्न ढिलाइ भएको बताउँदै विभागले कसैलाई जोगाउन नखोजेको दाबी गर्नुभएको छ । यसका साथै, एपस्टिनको कारागारभित्रै ज्यान गएको सम्बन्धी नयाँ विवरणहरूले थप शंका उत्पन्न गरेका छन् । यी फाइलहरूले एपस्टिन काण्डको अन्त्य नभइ ठूलो राजनीतिक, कानुनी र नैतिक बहसको शुरुआत गरेको विशेषज्ञको टिप्पणी छ ।