बङ्गलादेशमा अभियोजनकर्ताहरूले पूर्वप्रधानमन्त्री शेख हसिनाविरुद्ध मृत्युदण्डको माग गरेको छ । गएको वर्ष भएको विद्यार्थी नेतृत्वको विरोध प्रदर्शनलाई दबाएकोमा मानवताविरुद्धको अपराधको आरोप लगाउँदै अभियोजनकर्ताहरूले ७८ वर्षीया हसिनाविरुद्ध मृत्युदण्डको माग गरेको बीबीसीले जनाएको छ ।

मानवताविरुद्ध अपराध गरेको अभियोगमा हसिनाको अनुपस्थितिमै उहाँविरुद्ध मुद्दा चलेको छ । सार्वजनिक भएको एउटा अडिओ क्लिपमा शेख हसिनाले आन्दोलनकारीहरूविरुद्ध ‘घातक हतियारहरू’ प्रयोग गर्न निर्देशन दिनुभएको सुनिन्छ । यद्यपि उहाँले आफूमाथि लागेका अभियोगको खण्डन गर्नुभएको छ ।

केही हप्ता चलेको प्रदर्शनका क्रममा बाङ्गलादेशमा झन्डै एक हजार चार सय जनाको ज्यान गएको थियो । प्रदर्शनकै कारण १५ वर्षदेखि शक्तिको केन्द्रमा रहनुभएकी शेख हसिना सत्ताच्युत हुनुभएको थियो । उहाँले अहिले भारतमा शरण लिनुभएको छ ।

सन् १९७१ मा पाकिस्तानबाट स्वतन्त्र भएपछि बाङ्गलादेशमा गएको वर्ष भएको हिंसा अहिलेसम्मकै ठूलो मानिन्छ । हसिनालाई एक हजार चार सय पटक मृत्युदण्ड दिनुपर्ने तर मानवीय रूपमा यो सम्भव नभएकाले कम्तीमा एउटा मृत्युदण्डको माग गरेको बङ्गलादेशका प्रमुख सरकारी वकिल ताजुल इस्लामले बताउनुभएको खबरमा उल्लेख छ ।