अभयराज मिश्र
चेलीः ढकमक्क प्यौली फुल फुल्यो काफल पाकी डाली
वसन्त आइगयो इजु झिक्क सोराइ लागी।
न्याउली बासी कुँहु कुँहु पुराई रंगी बन
झान् लाग्यो चैतको मैना भेट्टु औना कन ।
इजा: मुईअन्थ्यु चस्कन्छ खुट्टो तेर् बाबा लाई दम छ
दाई तेरो प्रदेश तिर एईसाल आएई कम छ।
तेरी बौंजु सहर बस्सी नाति पडौनाकी
याँ पड्या नाइँ हुनो भुन्थी आगा बडौनाकी ।
चेली: नौंकलैं लायाकी इजा घर पन छिप्याकी
कामकी भोरान्दु आइगै गौं बाली टिप्याकी ।
घर मथी बोटभरीको कोइराल फुल फुल्योकी
भद भुणन्थ्यो आमा झानु आज भोल भुल्योकी ।
इजा: न घर छिप्या न नौं कलै अईल अठारकी
भुणेर कि गरौं बुवा काम का चटारकी ।
केइ खेतो मृगले खायो केइ चुट्यो डालले
खानाकी होइझालो नाना बचाया कालले ।
जन् माणे निस्वास झिक अर्खा साल औंला
चैतको भिटौलो छौना संगै बसि खौला ।
लेकम गाउँपालिका वडा नम्बर ५ नचने दार्चुला, घर भएका मिश्र हाल शैल्यशिखर नगरपालिका वडा नम्बर ८ झरकाँडामा वडा सचिव हुनुहुन्छ ।
यो खबर पढेर तपाईलाई कस्तो महसुस भयो ?
भर्खरै प्रकाशित
प्रतिक्रिया