दाई हजुरको शुभलगनको साइत जुरेछ, तपाइको आफ्नै सहोदर भाइको पुर्पुरो फुरेछ भनेर भन्दा मेरो खुसीमा डाह गरिस भन्नुहोला तर अझै पनि भाइ निम्तो आउला कि भनी पलपल कुरेछ ।
एउटै आमाबाको कोखबाट हजुरको जन्म छिटो भयो मेरो ढिलो हुनुमा के दोष, के म तिनै आमाबाको सन्तान र तपाईको सहोदर भाइ हैन र किन यस्तो विभेद गर्नुभो नखुल्दै मेरो होस ।
भनेको सुन्छु दाजुभाइको पैतृक सम्पतिमा समान हक हुन्छ अरे, मेरा लागि त आमाबाले जन्मिदै भेदभाव गर्न सुरू गरे । तपाइलाई त ६ महिनासम्म संस्कार सहित बाच्न सिकाए, आइपर्ने भीड र समस्या संग सहजैसंग भीड्न सिकाए, सके बाच्नु नसके मर्नु भनी म अबोध बालकलाई लत्याइ फाल्दा पनि बाचेको छु दाजु टुहुराजस्तै बने पनि ।
हजुरका लागि सिचाइ हुने मलिला खेतबारी बनेका महल अनि मेरा भागमा सुख्खा डाँडाको खेती र ओडार पो परे । यस्तो गर्दा पनि केही नबोली लड्दै पड्दै भाइ बामे सर्ने भएको छ, ओत लाग्ने ठाउँ खोजी सानो बारीमा पसिना र पौरखले हरियाली छाएको छ ।
सोचेथे आमाबाले छोडेपनि मेरो दाजु छोड्ने छैनन , मलाई एक्लै बनाएर आफ्नो कुनो मात्र जोड्ने छैनन । ।।।
कुर्दाकुर्दै मेरा दिन गए हजुरले बाटो मोड्दै जानुभो कहि कतै टाल्न बाकी आफ्नै महलका प्वालहरू टाल्नुभो , हेरिरहन्थे मुहारपुस्तिकामा देखे लगनको साइत अरे खुसीले फुरूङ्ग हुन नपाउदै आवाज आयो बल्ल खाइस रे । ,
किन भनिस साथी यस्तो भन्दा भित्र पढेर हेर भन्यो, एउटै परिवारको कान्छो भाइलाइ उत्सवमा प्रबेश निषेध रे, छिनभरमै सपना टुक्रिगए कालो बादल मडारियो आमाबा र सहोदर दाईबाट किन यस्तो व्यवहार गरियो ।
फेरि सुने साइत सरेछ सोचे पक्कै अब मलाई निम्ता आउँछ, अभिभावकविहिन यो जीन्दगीले दाईको अभिभावकत्व पाउछ, फेरि साइत तोकिएछ मलाई निम्तो आको छैन अझै पनि ममाथि निराशाले छाको छैन ।
यदि म सहयात्री बन्न लायक थिएन भने कान्छो भाइ कसरी बने, तिनै तपाईका आमाबाले हाम्रै पुत्र होस कसरी भने, म फुट्न चाहन्न संगै मिलौ अझै धेरै बिग्रेको छैन यस्तै गर्दै गयौ भने चुप लागेर अब म बस्ने हैन ।
मैले जन्मेको नक्षत्रमा जन्मेका सबैमाथि यस्तै विभेद भो अरे, जन्म दिनेको दोष हो हामीलाई अबोध शिशुले के गलत गरे, एउटै आमाका सन्तान फुटेर जानू राम्रो होइन , दाजुको लगनको निमन्त्रणा आउने आश अझै मरेको छैन । (सन्दर्भ निजामती कर्मचारीहरूको आधिकारिक ट्रेड युनियन निर्वाचन)
लेखक : ममता बिष्ट, दार्चुलाको लेकम गाउँपालिकामा लेखा अधिकृत पदमा कार्यरत हुनुहुन्छ ।
यो खबर पढेर तपाईलाई कस्तो महसुस भयो ?
भर्खरै प्रकाशित
प्रतिक्रिया