दार्चुला । दार्चुलाको शैल्यशिखर नगरपालिकामा दादुरा रूवेला खोप अभियान सम्बन्धि अभिमुखिकरण गोष्ठी आयोजना गरिएको छ । शैल्यशिखर नगरपालिकाको केन्द्र गोकुलेश्वरमा नगरपालिका स्तरीय खोप समन्वय समितिको अभिमुखिकरण गोष्ठी सम्पन्न भएको हो । शैल्यशिखरमा ९ वडाका ३३ खोपकेन्द्रबाट एक हजार ५९३ जना बालबालिकाले खोप पाउने बताइएको छ ।

शैल्यशिखर नगरपालिकाका प्रमुख विजयसिंह धामीको अध्यक्षतामा आयोजित गोष्ठीमा राष्ट्रिय खोप कार्यक्रमको उद्वेश्य, उपलब्धि र चुनौतीबारे स्वास्थ्य शाखा प्रमुख शिवदत्त जोशीले जानकारी दिनुभएको थियोे । दादुरा रूवेला खोपको कभरेज, महामारीको अवस्था, नियन्त्रणका उपाय र खोप अभियानबारे कार्यक्रममा अभिमुखिकरण गरिएको छ । सन् २०२६ सालसम्म दादुरा रूवेला खोप नियन्त्रण गरिसक्ने लक्ष्य रहेको उहाँले बताउनुभयो । दार्चुलासहित ५१ जिल्लामा पाँच वर्षमुनिका बालबालिकालाई र बढी जोखिम भएका बाकी २६ जिल्लामा १५ वर्षमुनिका बालबालिकालाई दादुरा रूवेला विरूद्वको खोप लगाइदैछ । शैल्यशिखरमा फागुन १३ गतेदेखि १६ गतेसम्म दादुरा रूवेला विरूद्वको खोप अभियान सञ्चालन हुने भएकोले पाँच वर्षमुनिका बालबालिकालाई नजिकैको खोप केन्द्रमा खोप सञ्चालन हुने दिन अनिवार्य खोप लगाउन अनुरोध गरिएको छ ।

फागुन ९ गते आज सम्पन्न अभिमुखिकरण गोष्ठीमा नगरप्रमुख विजयसिंह धामी, उपप्रमुख शान्ति खडायत,  प्रमुख प्रशासकीय अधिकृत भोजराज भट्ट, स्वास्थ्य शाखा प्रमुख शिवदत्त जोशी लगायत जनप्रतिनिधि, कर्मचारी र स्वास्थ्यकर्मी, सञ्चारकर्मी लगायतको सहभागीता रहेको थियो । दादुरा रूवेला रोग १ जनाबाट १८ जनालाई संक्रमण गर्न सक्ने भएकोले महामारीबाट बच्न अनिवार्य खोप लगाउन अनुरोध गरिएको छ ।

नेपालमा हाल १३ रोगबाट बचाउन मासिक खोप अभियान नियमित रूपमा सञ्चालन हुँदै आएको छ । शैल्यशिखरमा ३३ खोप केन्द्रबाट नियमित खोप दिने गरिएको छ । हालसम्म ७२ जिल्लाका ७३३ स्थानीय तह पूर्ण खोप सुनिश्चितता घोषणा भइसकेका छन् । खोप नि:शुल्क पाइन्छ, सुरक्षित छ र खोपले जीवन रक्षा गर्छ, त्यसैले अनिवार्य खोप लगाउन अनुरोध गरिएको स्वास्थ्य शाखाले जनाएको छ ।