दार्चुला । नेपाल सरकारले प्रतिनिधिसभाको मध्यावधि चुनावको घोषणा गरेसंगै दार्चुलामा पनि चुनावको आवश्यक तयारी थालिएको छ ।
सरकारले आगामी वैशाख १७ र २७ गते दुई चरणमा प्रतिनिधिसभाको चुनाव गर्ने घोषणा गरेसँगै दार्चुलामा पनि तयारी थालिएको निर्वाचन कार्यालयले जनाएको छ । सरकारले प्रतिनिधिसभा विघटन गरेर निर्वाचनको मिति घोषणा गरेपछिको विवाद सर्वोच्च अदालतमा विचाराधिन अवस्थामा रहेपनि आयोगले मतदाता नामावली अध्यावधिकको काम गर्न थालेको हो ।
मतदानकेन्द्र पुनरावलोकनको टुंगो लगाउन यही पुस २८ गते जिल्ला प्रशासन कार्यालय दार्चुलामा सर्वदलिय बैठक राखिएको छ । यसअघि २०७४ सालको प्रतिनिधिसभा र प्रदेश सभा निर्वाचनका लागि दार्चुलामा ११० मतदानस्थल तथा १२९ मतदान केन्द्र तोकिएका थिए । त्यसैको आधारमा वर्तमान परिस्थितिलाई समेत ख्याल गरेर मतदान केन्द्रको टुंगो लगाइने जिल्ला निर्वाचन कार्यालय दार्चुलाका सूचना अधिकारी चित्र प्रकाश जोशीले जानकारी दिनुभयो ।
अगामी माघ १५ देखि २४ गतेसम्म मतदाता नामावली दाबी विरोधको कार्यक्रम रहेको छ । उक्त दाबी बिरोधको कार्यक्रम जिल्लाका नौँ वटै स्थानीय तहका केन्द्रमा सञ्चालन हुने जिल्ला निर्वाचन कार्यालय दार्चुलाले जनाएको छ ।
मतदाता नामावली दाबी विरोधको नतिजा आएपछि जिल्लामा कति मतदाता छन भन्ने एकिन हुने निर्वाचन कार्यालयले जनाएको छ । निर्वाचन कार्यालयको तथ्याङक अनुसार दार्चुलामा झण्डै ७८ हजार ५१३ जना मतदाता रहेका छन् ।
