दार्चुला । जिल्ला कारागार दार्चुलामा क्षमता भन्दा दोब्बर कैदी बन्दी हुँदा समस्या भएको छ । २५ जना पुरुष राख्न सकिने क्षमता भएको कारागारमा कोचाकोच गरेर ५० जना पुरुष कैदी बन्दी राखिएको छ ।

हाल कारागारमा ४७ कैदी र छ बन्दी गरी ५३ जना कैदीबन्दी रहेका छन् । जसमध्ये दुई कैदी र एक थुनुवा गरी तीन जना महिला रहेको जेलर मान बहादुर खडायतले जानकारी दिनुभयो । ठाउँ अभावमा कैदी बन्दीहरुलाई खान र सुत्न समेत समस्या हुने गरेको छ । विहान शैचालय जादा लाइन लाग्नुपर्ने अवस्था रहेको जेलर खडायतले बताउनुभयो ।

जिर्ण बन्दै गएका भवनमा सुत्न समेत ठाउँ अभाव हुने गरेकोले कैदी बन्दीहरु समय समयमा बिरामी पर्ने गरेका छन् । स्वास्थ्य परीक्षण र उपचारका लागि स्वास्थ्यकर्मी नहुदा सामान्य स्वास्थ्य समस्या देखिदा समेत कैदी बन्दीहरुलाई जिल्ला अस्पताल लैजानुपर्ने बाध्यता रहेको जेलर खडायतले बताउनुभयो । कारागारमा अहेबको दरबन्दी भएपनि चार वर्षदेखि रिक्त रहेको छ ।

दार्चुला कारागारमा २०७३ साल मंसिर २१ गतेसम्म हेल्थ असिस्टेण्ट पदमा मोहन महरा कार्यरत भएपनि उहाँको जिल्ला अस्पताल सरुवा भएपछि कोहि पनि स्वास्थ्यकर्मी कारागारमा नआएको खडायतले बताउनुभयो । चार वर्षदेखि स्वास्थ्यकर्मी नहुदा कैदी बन्दीहरुको नियमित स्वास्थ्य परीक्षण र उपचारमा समस्या भइरहेको छ ।

एक जना कैदीलाई माफी

संविधान दिवसको अवसरमा जिल्ला कारागार दार्चुलामा कैद भुक्तान गरिरहेका नौगाड गाउँपालिका–६ धुलिगाडाका एक जना कैदीले माफी पाएका छन् । कर्तव्य ज्यान मुद्धामा ६ बर्ष पहिले जेल चलान गरिएका धुलिगाडाका आनसिह ठगुन्नाको बाँकी कैद मिनाहा गर्दै माफी दिइएको कारागार दार्चुलाका जेलर मान बहादुर खडायतले बताउनुभयो ।

शुरुमा २० बर्ष कैद फैसला भएका ठगुन्नाको सर्बोच्च अदालतबाट कैद सजाय घटाएर १२ बर्ष कायम गरिएको थियो । ६ बर्ष ३ महिना ४ दिन कैद सजाय भुक्तान गरिसकेका ठगुन्नालाई ५ बर्ष ८ महिना २६ दिन कैद माफी गर्दै रिहा गरिएको हो । मन्त्रिपरिषद्को सिफारिसमा शनिबारदेखि लागू हुने गरी दार्चुलाका ठगुन्ना सहित २८९ जना कैदी बन्दीले संविधान दिवसको अवसरमा माफी पाएका हुन् ।

संविधानको धारा २७६ को फौजदारी कसुर ऐन, २०७४ र फौजदारी कसुर (कैद कट्टा) नियमावली, २०७६ को व्यवस्था अनुसार कैदी बन्दीको कैद मिनाह गर्न सक्ने व्यवस्था छ।