कोरोना भाइरस संक्रमणको जोखिमका बिच विद्यार्थीहरुको समस्यालाई मध्यनजर गरेर कक्षा सञ्चालन गरिरहेको पुर्चौडी नगरपालिकामा विद्यालयहरुको स्वास्थ्य सुरक्षाको अवस्थाबारे नगरकार्यपालिकाको टोलीले अनुगमन तथा विद्यालय भेटघाट कार्यक्रम सञ्चालन गरिरहेको छ ।
विद्यालयहरुमा स्वास्थ्य सुरक्षाका मापदण्डहरुको पालना भए नभएको विषयमा अनुगमनका साथै जोखिम न्यूनिकरणका लागि सरोकारवालाहरुसंग छलफल भइरहेको पुर्चौडी नगरपालिका शिक्षा शाखा प्रमुख दिनेश नगारीले जानकारी दिनुभयो ।
मंगलबार नगरपालिकाको वडा नम्बर ४ र ५ तथा बुधबार वडा नम्बर ३ र १ मा सञ्चालित केहि विद्यालयहरुको अनुगमन गरिएको छ । अनुगमन तथा विद्यालय भेटघाट कार्यक्रममा नगरप्रमुख रण बहादुर कुँवर, उपप्रमुख जानकी ऐर बम, लेखा शाखा प्रमुख दल बहादुर धामी, शिक्षा शाखा प्रमुख दिनेश नगारी लगायतको सहभागिता रहेको छ ।
विद्यालय व्यवस्थापन समितिका पदाधिकारी, शिक्षक र अभिभावकहरुसंग विद्यालयले अपनाएको स्वास्थ्य सुरक्षाका उपायहरुको विषयमा छलफल गर्दै अगामी दिनमा थप सुधार गर्ने सुझाबहरु दिइएको छ ।
खासगरी विद्यालयमा स्यानेटाइजर, मास्क, साबुनपानी लगायतको उपलब्धता र व्यवस्थापन भए, नभएको, सामाजिक दुरी कायम गर्ने लगायतका स्वास्थ्य सुरक्षाका मापदण्डको पालना गर्नुपर्ने विषयमा छलफल गरिएको शिक्षा शाखा प्रमुख नगारीले बताउनुभयो ।
शिक्षक र विद्यार्थीहरुको स्वास्थ्य सुरक्षाका लागि नगरपालिकाबाट मास्क उपलब्ध गराइएको र साबुन विद्यालयले किन्ने र नगरपालिकाले आर्थिक सहयोग गर्ने व्यवस्थापन गरिएको छ ।
पुर्चौडी नगरपालिकाले क्वारेन्टाइन निर्माण गरेका विद्यालयहरुलाई स्यानिटाइज (सरसफाई) गरेर कक्षा सञ्चालन गरेको छ । विद्यालयहरुमा आइसोलेसन निर्माण गर्नुपर्ने बाध्यताको अन्त्य गर्न ३० कोठे आइसोलेसन भवन निर्माण सम्पन्न हुने चरणमा रहेको छ ।
कोरोना प्रभाव र दशैँ विदाका कारण रोकिएका बैकल्पीक सिकाई कक्षाहरु १६ गतेदेखि सञ्चालन भएको पुर्चौडी नगरपालिका शिक्षा शाखा प्रमुख नगारीले जानकारी दिनुभयो ।
पुर्चौडी नगरपालिका भित्रका ७५ सामुदायिक र ३ संस्थागत गरी ७८ वटै विद्यालयमा पठनपाठन भइरहेको छ । पुर्चौडीमा झण्डै १४ हजार विद्यार्थी अद्ययनरत रहेका छन् ।
यो खबर पढेर तपाईलाई कस्तो महसुस भयो ?
प्रतिक्रिया
भर्खरै प्रकाशित
