दार्चुला । नेपाल कम्युनिष्ट पार्टी (नेकपा) को प्रचण्ड–माधव समुहले तत्कालीन नेकपा माओवादीको नेतृत्वमा भएको १० वर्षे सशस्त्र युद्धको स्मरण गर्दै शनिवार २६ औँ जनयुद्ध दिवस मनाइरहेको छ ।
दार्चुलाको मार्मा गाउँपालिकाले लटिनाथमा जनयुद्ध दिवस भव्यताका साथ मनाउने तयारी गरिएको जनाएको छ ।
मार्मा गाउँपालिकाले बृहत रुपमा जनयुद्ध दिवस मनाउन सरोकारवालाहरुलाई जानकारी गराएको छ ।
जनयुद्ध दिवसको अवसरमा मार्मा गाउँपालिकामा सञ्चालन हुने कार्यक्रममा नेकपा प्रचण्ड-माधव समूहका सुदूरपश्चिम प्रदेश कमिटी सह इन्चार्ज खगराज भट्टको प्रमुख आतिथ्य रहने मार्मा गाउँपालिका अध्यक्ष जमनसिंह धामीले जानकारी दिनुभयो । यस्तै कार्यक्रमको विशेष अतिथि सुदूरपश्चिम प्रदेश सभा सदस्य मानबहादुर धामी लगायत नेताहरु मार्मा पुगेका छन् ।
सांस्कृतिक कार्यक्रम सहित दिवसलाई भव्य मनाउन कार्यक्रममा गायक मनोजसिह धामीको समेत प्रस्तुती रहने जनाइएको छ ।
गाउँपालिकाले पहिलो पटक भव्य रुपमा दिवस मनाउन लागेको भन्दै शान्ति, सुरक्षालाई मध्यनजर गरेर गाउँपालिका क्षेत्रमा मदिरा सेवन तथा विक्रिवितरणमा रोक लगाइएको गाउँपालिकाले सार्वजनिक सूचनामार्फत जानकारी गराएको छ ।
यो खबर पढेर तपाईलाई कस्तो महसुस भयो ?
भर्खरै प्रकाशित
प्रतिक्रिया