पाकिस्तानको अदालतले जेलमा रहेका पूर्वप्रधानमन्त्री इमरान खानको पार्टीका १ सय ८ जना सदस्यलाई जेल सजाय सुनाएको छ ।
सन् २०२३ मा सेनाविरुद्धको विरोध प्रदर्शनमा संलग्न भएको आरोपमा इस्लामाबादको ‘एन्टी–टेररिजम कोर्ट’ ले खानको पार्टी ‘पाकिस्तान तहरिक–ए–इन्साफ’ (पीटीआई) का सदस्यहरूलाई जेल सजाय सुनाएको बीबीसीले जनाएको छ ।
सजाय सुनाइएकाहरूमा पाकिस्तानको राष्ट्रियसभाका विपक्षी नेता उमर अयुब खान पनि छन् जसलाई १० वर्षको जेल सजाय सुनाइएको छ । अदालतको यो निर्णयले पूर्वप्रधानमन्त्री इमरान खानको पार्टी ‘पीटीआई’ लाई ठूलो झड्का लागेको खबरमा उल्लेख छ ।
सन् २०२३ को मे महिनामा सुरक्षा बलले भ्रष्टाचारको आरोपमा अदालतमा उपस्थित हुने क्रममा इमरान खानलाई पक्राउ गरेपछि देशभर हिंसात्मक विरोध प्रदर्शनहरू भएका थिए ।
अदालतको फैसलाको विपक्षी नेताहरूले निन्दा गरेका छन् । अदालतको फैसलामा पीटीआईका ६ जना सांसदलाई पनि अयोग्य घोषित गरिएको छ ।
प्रतिक्रिया