दार्चुलाको दुर्गम व्याँस गाउँपालिका–२ दुम्लिङसम्म पहिलो पटक गाडी पुगेको छ । निर्माणाधीन दार्चुला–टिंकर सडक खण्डअन्तर्गत नेपाली सेनाले सडक स्तरोन्नतिको काम गरिरहेकै क्रममा शनिबार निर्माण सामग्री बोकेका ट्र्याक्टर र जिपहरु दुम्लिङ पुगेका हुन् । नेपाली सेनाले निर्माण गरिरहेको सडकअन्तर्गत तल्लो दुम्लिङ–घट्ट क्षेत्रसम्म गाडी पुगेपछि स्थानीयवासी उत्साहित बनेको स्थानीय जनकसिंह धामीले बताउनुभयो । वर्षौंदेखि सडक पहुँचको प्रतीक्षामा रहेका व्याँस क्षेत्रका नागरिकका लागि यो महत्वपूर्ण उपलब्धि भएको उहाँले बताउनुभयो ।

सडक सञ्चालनसँगै दैनिक उपभोग्य सामग्री ढुवानी, बिरामीको ओसारपसार तथा शिक्षा र अन्य सेवा सुविधामा सहजता आउने अपेक्षा गरिएको छ । नेपाली सेनाले निर्माण गरिरहेको तुसारपानी–तिङ्कर सडकअन्तर्गत शून्य विन्दु तुसारपानीदेखि दुम्लिङसम्मको १२ किलोमिटर सडक निर्माण सम्पन्न गरेपछि यातायात सञ्चालन भएको छ ।

नेपाली सेनाका अनुसार तुसारपानीदेखि तिङ्करसम्म निर्माणाधीन कूल ७९ किलोमिटर सडकअन्तर्गत हालसम्म २२ दशमलव १५ किलोमिटर सडकको ट्रयाक खोल्ने कार्य सम्पन्न भएको छ ।

नेपाल–चीन सीमा क्षेत्रसँग जोडिएको व्याँस क्षेत्र भौगोलिक रूपमा अत्यन्त विकट मानिन्छ । वर्षौंदेखि यहाँका नागरिकले पैदलमार्गको भरमा यात्रा गर्नुपर्ने बाध्यता भोग्दै आएका थिए । सडक विस्तारसँगै स्थानीय बासिन्दाको जीवनस्तरमा सुधार आउने विश्वास गरिएको छ ।

नेपाली सेनाले आर्थिक वर्ष २०७७÷७८ देखि उक्त सडक निर्माण अघि बढाउँदै आएको हो । हिमाली तथा चट्टानी भूभागमा कठिन परिस्थितिका बीच सडक निर्माण भइरहेको सेनाले जनाएको छ । रणनीतिक तथा विकासका दृष्टिले महत्व बोकेको यस सडकले सीमा क्षेत्रका बासिन्दालाई राष्ट्रिय सडक सञ्जालसँग जोड्ने अपेक्षा गरिएको छ ।

टिंकर सडक आयोजनाका आयोजना प्रमुख, प्रमुख सेनानी राजेश कटुवालले बैशाख दोस्रो साता निर्माण क्षेत्रको अनुगमन गर्दै दुम्लिङसम्म केही दिनमै गाडी पुगाउने तयारी रहेको बताउनुभएको थियो ।

यसअघि सेनाले व्याँस गाउँपालिका–३ तुसारपानी हुँदै वडा नम्बर २ का माल, कोठेधार, कल्जु, आतुङती, तम्बाकु र दुम्लिङलगायत क्षेत्रमा सडक ट्र्याक खोल्ने तथा स्तरोन्नतिको काम गरिसकेको छ ।

यस्तै छाङरु–गागा क्षेत्रमा करिब २ हजार ३ सय मिटर सडक ट्र्याक समेत खोलिएको जनाएको छ । ७९ किलोमिटर सडक ट्र्याक खोल्ने जिम्मा पाएको नेपाली सेनाले बजेट अभावका कारण अपेक्षित गतिमा काम गर्न भने सकेको छैन । सामरिक तथा जनजीवनका हिसाबले महत्वपूर्ण मानिएको दार्चुला–टिंकर सडक निर्माणलाई तीव्रता दिन आगामी आर्थिक वर्षमा पर्याप्त बजेट विनियोजन गर्नुपर्ने माग स्थानीय तथा सरोकारवालाले गरेका छन्।