दार्चुला । गत सातादेखि अवरुद्ध दल्लेख खलंगा सडक नौगाड गाउँपालिकाले मर्मत गरेपछि सुचारु भएको छ ।
जेठ ३ र ४ गतेको अविरल बर्षाको कारण देथला खार खलंगा सडक खण्डको महाकाली नगरपालिका वडा नम्बर २ मैखोली देखि नौगाड गाउँपालिकाको वडा नम्बर २ दल्लेख, बैडारी गाउँ सम्मको सडक अवरुद्ध भएको थियो ।
नौगाड गाउँपालिकाले आफ्नै स्काभेटर मेसिन (जेसिभि) प्रयोग गरेर अवरुद्ध सडक सुचारु गरेपछि यातायातका साधनहरु सञ्चालन हुन थालेको नौगाडबाट सन्तोषसिंह ठगुन्नाले जानकारी दिनुभयो ।
कोरोना माहामारीको बिषम परिस्थितिमा बाटो अवरुद्घ भएपछि बिरामीहरुका साथै यात्रुहरुलाई अस्पताल लैजान समस्या भएको थियो । महाकाली नगरपालिका र नौगाड गाउँपालिकाको विभिन्न स्थानमा अवरुद्ध सडक सुचारु भएपछि बिरामी र यात्रुहरुलाई सहज भएको नौगाडबाट रेडियो लोकदर्पण समाचारदाता प्रकाशसिंह धामीले बताउनुभयो ।
यस्तै नौगाड गाउँपालिकाको होपरीगाड जामिर क्षेत्रको सडकमा पनि केहि स्थानमा बर्षाको कारण ढुङ्गा, माटो, पहिरो खसेर यातायात सञ्चालनमा समस्या भएको थियो । नौगाडका जनप्रतिनिधिहरुको पहलमा महाकाली नगरपालिका वडा नम्बर २ मैखोली क्षेत्रदेखि नौगाड गाउँपालिका वडा नम्बर २ दल्लेख हुँदै होपरिगाड क्षेत्रसम्म समेत सडक सफा गरेर सञ्चालनमा ल्याइएको स्थानीय सन्तोष ठगुन्नाले बताउनुभयो ।
बर्षातको समयमा अवरुद्ध हुने सडक मर्मतका लागि नौगाड गाउँपालिकाले जेसिभि तयारी अवस्थामा राखिएको बताइएको छ ।
यो खबर पढेर तपाईलाई कस्तो महसुस भयो ?
भर्खरै प्रकाशित
प्रतिक्रिया