दार्चुला । महालेखापरीक्षकको कार्यालयअन्तर्गत लेखा परीक्षणका लागि सञ्चालन गरिएको नेपाल लेखा व्यवस्थापन प्रणालीलाई छलेर किर्ते गरेको आरोपमा दुहुँ गाउँपालिकाका लेखापाल गणेशदत्त भट्टलाई प्रहरीले पक्राउ गरेको छ।
गत आर्थिक वर्ष २०८०/८१ मा महालेखापरीक्षकको कार्यालयले गरेको लेखा परीक्षणमा लेखापाल भट्टले रु दुई लाख राजस्व दाखिला नगरेको आरोपमा किर्ते मुद्दामा पक्राउ गरिएको जिल्ला प्रहरी कार्यालय दार्चुलाका प्रहरी निरीक्षक एंव सूचना अधिकारी छत्र बहादूर रावतले जानकारी दिनुभयो ।
महालेखापरीक्षक तोयम रायाले लेखापाल भट्टमाथि उक्त विषयमा अनुसन्धान गर्न महालेखापरीक्षकको कार्यालयअन्तर्गत सुदूरपश्चिम प्रदेश हेर्न शाखालाई निर्देशन दिएकोमा शाखाले नेपाल सरकार गृह मन्त्रालय, सुदूरपश्चिम प्रदेश मुख्यमन्त्रीको कार्यालय, प्रहरी प्रधान कार्यालय र जिल्ला प्रहरी कार्यालय दार्चुलामा पत्राचार गरेपछि जेठ गते ७ गते जिल्ला सदरमुकाम खंलगाबाट प्रकाउ गरेको सूचना अधिकारी रावतले बताउनुभयो ।
पक्राउ परेका भट्टमाथी मुलुकी फौजदारी ऐनअन्तर्गत मुद्दा दर्ता गरेर जिल्ला अदालतबाट चार दिनको म्याद थप गरी अनुसन्धान भइरहेको उहाँले बताउनुभयो ।लेखापाल भट्टले आर्थिक वर्ष २०८०/८१ को समपरीक्षणका लागि २०८१ मङ्सिरमा लेखा व्यवस्थापन प्रणालीबाट राजस्व दाखिला भौचर बनाएर अपलोड गरी पैसा नबुझाएको महालेखापरीक्षकको कार्यालयले जनाएको छ। लेखापाल भट्टले अपलोड गरेको दुई लाखको भौचरबाट कुनै पनि रकम जम्मा नभएको देखिएपछि अनुसन्धान गर्न उहाँलाई पक्राउ गरिएको बताइएको छ।
राजस्व रकम दाखिला नभएको बारे कोष तथा लेखा नियन्त्रण कार्यालय दार्चुलाले दुहुँ गाउँपालिकालाई पत्रचार गरेपछि लेखापाल भट्टले पाँच महिनापछि गत चैत १९ गते मात्रै उक्त रकम दाखिला गरेको देखिएको छ ।
यो खबर पढेर तपाईलाई कस्तो महसुस भयो ?
भर्खरै प्रकाशित
प्रतिक्रिया