दार्चुला । नेपाली कांग्रेसको केन्द्रीय अनुशासन समितिले पार्टीका पूर्व सहमहामन्त्री एवम् पूर्वमन्त्री गोविन्दराज जोशीसहित तीनजना नेतालाई पार्टी अनुशासन उल्लङ्घन गरेको भन्दै पार्टीबाट निस्काशन गरेको छ ।

अनुशासन समितिले शनिबार सार्वजनिक गरेको निर्णयअनुसार पूर्व सहमहामन्त्री जोशी र कैलालीका कांग्रेस नेता एवम् पूर्व राज्यमन्त्री पुष्करनाथ ओझालाई पार्टीबाट पाँच वर्षका लागि निस्काशन गरिएको छ ।

गोविन्दराज जोशीले गएको प्रतिनिधि सभा सदस्यको निर्वाचनमा वरिष्ठ नेता रामचन्द्र पौडेलविरुद्ध बागी उम्मेदवारी दिँदा पौडेलले पराजय भोग्नुपरेको थियो । साथै तनहुँ नेपाली कांग्रेस जिल्ला कार्य समितिको समानान्तर अर्को कार्यसमिति गठन गर्ने मुख्य भूमिका पनि जोशी रहेको ठहर अनुशासन समितिले गरेको छ । कुनै बेला कांग्रेसमा निकै शक्तिशाली मानिएका जोशी अहिले पार्टीबाटै निस्काशनमा पर्नुभएको छ ।

यता कैलालीका ओझाले प्रतिनिधिसभा सदस्य निर्वाचनमा पार्टीका आधिकारिक उम्मेदवार डा. आरजु राणा देउवालाई हराउन सक्रिय भूमिका खेलेको ठहर गर्दै पार्टीको अनुशासन समितिले कारबाही गरेको हो ।ओझाले पार्टीको आधिकारिक उम्मेदवारलाई हराउनका लागि गरेको कुराकानीको अडियो रेकर्डसहित पार्टीमा उजुरी परेको अनुशासन समितिले जनाएको छ ।

डा. आरजु कांग्रेस सभापति शेरबहादुर देउवाकी श्रीमती हुनुहुन्छ । ओझा स्थानीय भएकाले बाहिरको उम्मेदवारलाई टिकट दिएको भन्दै आधिकारिक उम्मेदवारलाई हराउन लाग्नु भएको ठहर समितिको छ । निर्वाचनमा आरजु पनि पराजित हुनुभएको थियो ।

यसैगरी, अनुशासन समितिले डडेल्धुरा जिल्ला कार्य समितिका सचिव रामबहादुर बिष्टलाई महिला सदस्यलाई कुटपिट गरेको उजुरी परेपछि तीन वर्षका लागि निस्काशन गरेको छ । केन्द्रीय सदस्य भीष्मराज आङदम्बे संयोजक र सदस्यहरू देवेन्द्रराज कँडेल, किशोरसिंह राठौर, धनराज गुरुङ र उमाकान्त चौधरीले संयुक्तरुपमा हस्ताक्षर गरेको निर्णयमा सो कुरा उल्लेख छ ।

गएको संघीय संसद्, प्रदेश सभा र स्थानीय तहमा पार्टीको उम्मेदवारलाई असहयोग गर्ने २७९ जनालाई निर्वाचनकै क्रममा पार्टीबाट निस्काशन गरिएको जानकारी सदस्य गुरुङले दिनुभयो । उजुरी परेर स्पष्टीकरण सोधिएका कतिपय व्यक्तिलाई जिल्ला सभापतिहरूले पत्र नै नबुझाएको पाइएपछि ती सभापतिहरूलाई पनि सचेत गराइएको छ ।

निर्वाचनको क्रममा परेका अन्य व्यक्तिको उजुरीमाथि प्रमाण नपुगेको समितिले ठहर गरेको छ ।

-गाेरखापत्रबाट