दार्चुला । व्याँस गाउँपालिका वडा नम्बर १ को ब्यास घाँटी तथा कालापानी क्षेत्रसम्म सेवा विस्तार गर्ने उद्धेश्यले नेपाल टेलिकमले जिएसएम फोर जी (नमस्ते) को टावर निर्माण गरिरहेको छ । सिडिएमए (स्काइ) टावर मात्रै सञ्चालनमा रहेको ब्यास गाउँपालिका–१ छाङ्गरु स्वास्थ्यचौकी भवन नजिकै टेलिकमले नमस्तेको टावरमा ७५ प्रतिषत भौतिक निर्माणको काम सम्पन्न भइसकेको ब्यास गाउँपालिका वडा नम्बर १ का वडाअध्यक्ष अशोकसिंह बोहराले बताउनुभयो ।
अहिले ब्यास घाँटीमा अत्याधिक हिमपात भएकोले काम प्रभावित भएको छ, वडाअध्यक्ष बोहराले भन्नुभयो, अगामी बैशाख महिनाभित्र टावर निर्माण सम्पन्न गरेर ब्यास गाउँपालिका वडा नम्बर १ मा फोर जी ईन्टरनेट सेवा सहित सञ्चार सुविधा सुचारु हुनेछ । दार्चुलाको दुर्गम तथा सामरिक महत्तको ब्यास क्षेत्रमा सञ्चार सुविधा विस्तार गर्न सहयोग सरकार र पहल गर्ने व्याक्तिहरुलाई उहाँले धन्यबाद व्यक्त गर्नुभएको छ ।
गत आर्थिक वर्ष २०७६÷०७७ मा सुदूरपश्चिम प्रदेश सरकारको सहयोगमा टेलिकमको लागि दुई वटा भवन निर्माण गरिएको छ । ब्यासमा बाह्रैमास बस्ने गरी सशस्त्र प्रहरी बल नेपाल नम्बर ५० गुल्म स्थापना भएपछि सञ्चारको आवश्यकता झनै बढेको छ । गृह मन्त्रालयले ब्यासको विकासका लागि विशेष प्याकेज बनाएर काम थालेसँगै टेलिकमको टावर पनि निर्माण भइरहेको बताइएको छ ।
नमस्तेको टावर जडान भएपछि छाङरु र तिकंर गाउँका साथै भारतले अतिक्रमण गरेका तीन गाउँ, नावी, गुञ्जी र कुटीसम्म यसको पहुँच पुग्नेछ । कालापानी देखिने डाँडामै नमस्ते फोनको रिपिटर टावर राखिन लागेको टेलिकमले जनाएको छ । यसअघि पनि ब्यासको छाङ्गरुमा रहेको सिडिएमए टावरले छियालेक, बुदी, गव्र्याङ्गका नागरिकलाई सहजरूपमा नेपाली फोनको सुविधा पुगेको थियो ।
हिमपात हुनुअघि नै टावर निर्माण गरेर सञ्चालन गर्ने तयारी भएपनि विभिन्न कारणले समयमै काम सम्पन्न नहुदा हिमपात नरोकिदासम्म टावर सञ्चालन गर्न सकिने सम्भावना नरहेको नेपाल टेलिकम दार्चुलाले जनाएको छ । जिएसएम बिटिएससंगै सशस्त्र प्रहरीको भिएचएफ सञ्चार सेट पनि जडान गर्ने तयारी भएको छ ।
सशस्त्र प्रहरीलाई खबर आदानप्रदान तथा सञ्चार गर्न समस्या भएपछि छुट्टै प्रविधिमार्फत सञ्चार जोडिन लागेको हो । सरकारले परनिर्भरता हटाउन दार्चुलाको ब्यास गाउँपालिकामा विशेष एकीकृत कार्ययोजना तयार पारेर विकास निर्माण थालेको छ ।
यो खबर पढेर तपाईलाई कस्तो महसुस भयो ?
प्रतिक्रिया
भर्खरै प्रकाशित
