दार्चुला । सम्भावित कोरोना सङ्क्रमित खोज्न र निरोगीलाई सचेतनामूलक जानकारी दिन नौगाड गाउँपालिकामा स्वास्थ्यकर्मीको टोली गाउँघरमा पुगेको छ ।
गाउँपालिकाको छ वटै वडामा स्वास्थ्य चौकी प्रमुखहरुको नेतृत्वमा स्वास्थ्यकर्मी र ल्यावसहितको टोलीले घरघरमा पुगेर सम्भावित बिरामीको वर्गीकरण गरी उपचार गरिरहेको रेडियो लोकदर्पणका नौगाड समाचारदाता प्रकाश सिंह धामीले जानकारी दिनुभयो । नौगाड गाउँपालिकाका २६ जनामा हालसम्म कोरोना पुष्टि भएको छ ।
गाउँमा बिरामी थला पर्न थालेपछि ल्याबसहितको टोली घरमै पुगेर ज्वारो आएको भए तत्काल परीक्षण गरेर कोरोना हो वा होइन भन्ने निश्चित गरी सोही अनुसारको उपचार गर्दै आएको उहाँले बताउनुभयो ।
यसअघि दार्चुलाको अपिहिमाल गाउँपालिका र दुहुँ गाउँपालिकाले स्वास्थ्यकर्मीलाई गाउँघरमै पठाएर स्वास्थ्य सेवा दिइरहेका छन् ।
निषेधाज्ञाका कारण स्वास्थ्य संस्थासम्म पुग्न नसकेका बिरामीहरुको स्वास्थ्य परीक्षण, प्राथमिक उपचार र परामर्श सेवा गाउँघरमै प्रवाह भइरहेको अपिहिमाल गाउँपालिका अध्यक्ष धर्मानन्द मन्यालले बताउनुभयो ।
यो खबर पढेर तपाईलाई कस्तो महसुस भयो ?
भर्खरै प्रकाशित
प्रतिक्रिया