दार्चुला । दार्चुलामा हालसम्म एक हजार २५२ जनामा कोरोना संक्रमण पुष्टि भएको छ । जसमध्ये एक हजार २४० जनाले कोरोना जित्न सफल भएका छन् । अहिले महाकाली नगरपालिकामा एक जनामात्रै सक्रिय संक्रमित रहेका छन् ।

हालसम्म ११ जनाले कोरोनाका कारण ज्यान गुमाएको स्वास्थ्य कार्यालय दार्चुलाका कोरोना भाइरस फोकल पर्शन बिरेन्द्र भट्टले जानकारी दिनुभयो । उहाँका अनुसार कोरोना भाइरस बिरुद्धको खोप लगाउने अभियान जारी छ । विहिबार (आज) देखि पाँच दिनसम्म जिल्लाका ९२ वटै खोपकेन्द्रबाट भेरोसेल खोपको दोस्रो मात्रा लगाउन खोप केन्द्रहरुमा खोप पठाइएको छ । लक्षितबर्ग अर्थात १८ बर्ष माथिका ७४ प्रतिषतले पहिलो मात्रा र ४० प्रतिषतले पूर्ण मात्रा खोप पाइसकेको स्वास्थ्य कार्यालय दार्चुलाले जनाएको छ ।

१८ बर्षमाथिको लक्षित जनसंख्या ९५,८०० मध्ये ७१,०४९ जनाले पहिलो मात्रा र ३७,९९९ जनाले पूर्ण मात्रा खोप पाएका छन् । दार्चुलाको कुल जनसंख्या एक लाख ४६ हजार भन्दा बढी रहेको छ । विहिबारदेखि १८ बर्षमाथिका ३० हजार मानिसलाई खोप लगाउने लक्ष्यका साथ खोप अभियान थालिएको जनस्वास्थ्य अधिकृत जयराज भट्टले बताउनुभयो ।

गत असोज १० देखि १४ गतेसम्म भेरोसेलको पहिलो डोज लगाएकाहरुलाई आज देखि दोस्रो डोज लगाइने स्वास्थ्य कार्यालय दार्चुलाले जनाएको छ । जिल्लाका नौ वटै स्थानीय तहमा भेरोसेल खोप पठाइएको छ । स्वास्थ्य कार्यालयका अनुसार शैल्यशिखर नगरपालिकामा सबै भन्दा बढि ४८ सय ५० डोज खोप पठाइएको छ । सबै भन्दा कम व्यास गाउँपालिकामा १५ सय डोज खोप पठाइएको छ । महाकाली नगरपालिकामा ४८ सय डोज, मालिकार्जुनमा ४३ सय डोज, दुहुँ गाउँपालिकामा २३ सय ६० डोज, लेकम गाउँपालिकामा २२ सय ५० डोज, नौगाड गाउँपालिकामा ३३ सय डोज, अपिहिमाल गाउँपालिकामा १९ सय डोज र मार्मा गाउँपालिकामा ३८ सय डोज खोप पठाइएको छ ।

दार्चुलामा ३१ हजार ३ सय डोज खोप मौज्दात रहेको स्वास्थ्य कार्यालयले जनाएको छ । खोपको पहिलो मात्रा लगाएकाहरुलाई नजिकको खोप केन्द्रमा खोप कार्डसहित आउन आग्रह गरिएको छ । खोप लगाउन छुट भएका नागरिकलाई समेत नजिकको स्वास्थ्य संस्थामा सम्पर्क गरेर खोप लगाउन स्वास्थ्य कार्यालय दार्चुलाले अनुरोध गरेको छ ।