दार्चुला । डेढ सताब्दी लामो इतिहास बोकेको नेपाल र भारतको सीमा क्षेत्र एवं काली र गोरी नदीको संगमस्थल जोलजिविमा ऐतिहासिक मेला जारी रहेको छ । मेला महोत्सब र व्यापारका कारण जोलजिवि मेलामा मानिसहरुको भिड लागेको छ । नेपाल, भारत र तिब्बत तीन देशको संस्कृति देख्न सकिने जौलजिवी मेला व्यापारीक दृष्टिकोणले महत्वपूर्ण मानिन्छ । यो बर्ष ऐतिहासिक जोलजिवि मेलामा हाम्रो सान, कला सस्कृति र पर्यटन प्रर्बद्धन हाम्रो अभियान भन्ने मुला नाराका साथ मंसिर १ देखि ११ गते सम्म महोत्सब समेत सञ्चालन भइरहेको छ ।

११ दिनसम्म मालिकार्जुन गाउँपालिका–७ जोलजिवि क्षेत्रमा चल्ने महोत्सवमा स्थानीय देखि राष्ट्रियस्तरका १५ कलाकारहरुको प्रस्तुती रहने महोत्सब आयोजक समितिका संयोजक राजेन्द्रसिह धामीले जानकारी दिनुभयो । महोत्सवमा चर्चित कलाकार खुमन अधिकारी, अज्जली अधिकारी, राजेन्द्र भट्ट (आर जे), सम्झना भण्डारी, खेम सेन्चुरी, ध्वज महरा, भुमिका गिरी, चेतन बोहरा, अर्जुन कौशल, रमेश राज भट्टराई, प्रवित्रा भन्डारी, भानुभक्त जोशी, शृजना खत्री, टंक तिमिल्सेना लगायत कलाकार आउने धामीले बताउनुभयो । स्थानीय कला संस्कृति झल्किने नृत्य र झाकीहरु, हास्य ब्यग्य प्रस्तुती र कलाकारको प्रस्तुती सहित रमाइलो मेला भइरहेको आयोजकले जनाएको छ । कृषि, पर्यटन, उद्योग, व्यापार प्रवद्र्धन गर्न मेला क्षेत्रमा विभिन्न व्यापारीक स्टलहरु र प्रचार सामाग्रीहरु समेत राखिएको समिति सदस्य कृष्ण धामीले बताउनुभयो । मेलाको सुदूरपश्चिम प्रदेशसभा उपसभामुख निर्मला बडाल जोशीले उद्घाटन गर्नुभएको छ ।

ऐतिहासिक जोलजिवि मेला १४९ बर्ष पुरानो हो । महाकाली र गोरी नदीको संगम जोलजिविमा नेपाल र भारत दुबै तर्फ यो मेला लाग्ने गर्दछ । सन् १८७१ मा भारतको अस्कोटका तत्कालीन राजा पुस्कर पालले जोलजिविमा ज्वलेश्वर मन्दिरको स्थापना गरि मेलाको सुरुवात गरेको किम्बदन्ती छ । त्यो समयको यो मेलामा नेपाल र भारतका ब्यापारीका साथै चीनको तिब्बतका ब्यापारीहरुले समेत ब्यापार गर्ने गरेका थिए । सन् १९६२ को भारत–चीन युद्ध पछि तिब्बतका ब्यापारीहरुले मेलामा भाग लिन छोडेको बताइन्छ ।

जोलजिवि मेलामा बाजुरा, जुम्ला तथा हुम्लाका घोडा, विभिन्न क्षेत्रका कपडा तथा खाद्यान्नको समेत ब्यापार हुने गरेको छ । भारततर्फ नोबेम्बर १४ देखि भारतीय प्रशासनको समन्वयमा मेला सुरु भइसकेको छ ।