दार्चुला । नेपाल राष्ट्रिय कर्मचारी संगठनले संघ, प्रदेश र स्थानीय तीनै तहका कर्मचारीलाई निजामती सरकारी कर्मचारीको परिभाषामा समावेश गर्न माग गरेको छ ।

संगठनका केन्द्रिय अध्यक्ष अम्बादत्त भट्टले आफूहरुले सरकारसमक्ष पेस गरेको सुझाव बमोजिम निजामती सेवा विधेयक ल्याउनुपर्ने बताउनुभयो । संघीय निजामती सेवा विधेयक सम्बन्धी अवधारणा प्रस्तुत गर्दै उहाँले संघ, प्रदेश र स्थानीय तीनै तहका कर्मचारीलाई निजामती सरकारी कर्मचारीको परिभाषामा समावेश गर्ने गरी विधेयक आउनुपर्ने बताउनुभयो ।

उहाँले आठ वर्ष बितिसक्दा पनि प्रशासनिक संघीयताको कार्यान्वयन हुन नसक्नु दुखद् पक्ष रहेको बताउनुभयो । भट्टले सेवा प्रवेश खरिदार, चौथो र अधिकृत स्तर, सातौ तहमा मात्र गर्नुपर्ने बताउनुभयो । उहाँले आफूहरुले प्रस्तुत गरेको अवधारणा पत्रलाई सरकारले बेवास्ता गरे आन्दोलनमा जान बाध्य हुने बताउनुभयो ।

संगठनका महासचिव डिलाराम खनालले स्थानीय तहका कर्मचारीको प्रदेश अन्तर्गतको आवधिक सरुवा पूर्वानुमानयोग्य एवं चक्रिय प्रणालीको आधारमा सम्बन्धित मुख्यमन्त्री र मन्त्रीपरिषद्को कार्यालयले गर्नुपर्ने बताउनुभयो । उहाँले प्रदेश प्रमुख सचिवको पद संघीय सेवाको पद हुनुपर्ने बताउनुभयो ।

संगठनले प्रदेश वा स्थानीय तहको एक तह माथिको पदमा बढुवा पाएका कर्मचारीहरु समेत संघमा बढुवा प्रक्रियामा सहभागी हुन बाधा नपुग्ने सुनिश्चितता गर्न माग गरेको छ ।