दार्चुला । दार्चुलामा १४ औँ जिल्लास्तरीय राष्ट्रपति रनिङ शिल्ड प्रतियोगिता यहीँ माघ २५ गते देखि २७ गतेसम्म सञ्चालन गर्ने निर्णय गरिएको छ ।
जिल्ला प्रशासन कार्यालय दार्चुलामा बसेको जिल्लास्तरीय राष्ट्रपति रनिङ शिल्ड प्रतियोगिता व्यवस्थापन निर्देशक समितिको बैठकले २०८० सालको जिल्ला स्तरीय राष्ट्रपति रनिङ शिल्ड प्रतियोगिता दार्चुला सदरमुकाम खलंगास्थित महाकाली नगरपालिका वडा नम्बर ४ शिवनगर खेलमैदानमा आयोजना गर्ने निर्णय गरेको हो ।
प्रतियोगितामा जिल्ला खेलकुद विकास समितिले जिल्लाका नौँ वटै स्थानीय तहलाई पालिकास्तरमा छनोट भएका विद्यार्थी खेलाडीहरुलाई सहभागी गराइदिन अनुरोध गरेको जनाएको छ । प्रतियोगितामा भलिबल, कबड्डी, एथलेटिक्स, तेक्वान्दो, कराते तथा उसु लगायत खेलहरू खेलाइनेछन् ।
गतवर्ष १३ औँ जिल्लास्तरीय राष्ट्रपति रनिङ शिल्ड प्रतियोगिता समेत जिल्ला सदरमुकाम खलंगामै आयोजना गरिएको थियो । यो वर्ष शैल्यशिखर नगरपालिकाको गोकुलेश्वरमा प्रतियोगिता सञ्चालन गर्ने अधिकांश पालिका प्रमुखहरू लगायतबिच अनौपचारिक सहमति भएकोमा निर्देशक समितिले खलंगामै प्रतियोगिता सञ्चालन गर्ने निर्णय गरेको हो । उक्त निर्णयप्रति शैल्यशिखर नगरपालिकाले असन्तुष्टि व्यक्त गर्दै गोकुलेश्वरमै प्रतियोगिता सञ्चालन गर्न अनुरोध गरेको जनाएको छ ।
गतवर्ष सम्पन्न १३ औं जिल्लास्तरीय राष्ट्रपति रनिङ शिल्ड प्रतियोगिताको उपाधी महाकाली नगरपालिकाले हात पारेको थियो ।
दार्चुलाको सबै पालिकामा अन्तर मावि स्तरीय स्थानीय राष्ट्रपति रनिङ शिल्ड प्रतियोगिता सम्पन्न भइसकेर पालिकास्तरीय टिम छनोट गरिएका छन् । जिल्लामा अन्तरपालिका स्तरीय टिमबीच प्रतिस्पर्धा हुनेछ ।
विगत ११ बर्षदेखि पत्रकारितामा सक्रिय लोकदर्पण मिडियाका संस्थापक/सञ्चालक लोकेन्द्र प्रसाद जोशी सामाजिक, आर्थिक, राजनीतिक लगायत समसामयिक विभिन्न विधामा कलम चलाउछन् ।
यो खबर पढेर तपाईलाई कस्तो महसुस भयो ?
भर्खरै प्रकाशित
प्रतिक्रिया