दार्चुला । दार्चुला जिल्ला सदरमुकाम खलंगास्थित शिवनगर खेलमैदानमा माघ २५ गतेबाट सञ्चालित १४ औँ जिल्ला स्तरीय राष्ट्रपति रनिङ शिल्ड प्रतियोगिताको उपाधी महाकाली नगरपालिकाले जितेको छ । महाकालीले १९ स्वर्ण, १० रजत, ९ कास्य गरी कुल ३८ पदक प्राप्त गर्दै राष्ट्रपति रनिङ शिल्ड प्रतियोगिताको उपाधी उचालेको हो ।

मालिकार्जुनले ७ स्वर्ण, ६ रजत र ७ कास्य पदक गरी कुल २० पदक प्राप्त गर्दै द्धितीय स्थान प्राप्त गरेको छ । भने मार्मा गाउँपालिकाले ६ स्वर्ण, ९ रजत र ३ कास्य गरी जम्मा १८ पदक प्राप्त गर्दै तृतीय भएको छ ।

नौगाड गाउँपालिकाले ४ स्वर्ण, ८ रजत, ८ कास्य गरी कुल २० पदक पाउँदै चौथो स्थान प्राप्त गरेको छ । शैल्यशिखर नगरपालिकाले ४ स्वर्ण, ४ रजत र १४ कास्य गरी जम्मा २२ पदकसहित पाँचौ स्थान प्राप्त गरेको छ ।

लेकम गाउँपालिकाले २ स्वर्ण, ४ रजत र ५ कास्य गरी कुल ११ पदकसहित छैटौँ स्थान प्राप्त गरेको छ । अपिहिमाल गाउँपालिकाले १ स्वर्ण, १ रजत र २ कास्य गरी ४ पदकसहित सातौँ स्थान प्राप्त गरेको छ । दुहुँ गाउँपालिकाले १ रजत र ५ कास्य पदक प्राप्त गर्दै आठौँ भएको छ भने व्याँस गाउँपालिकाले १ रजत, १ कास्य गरी २ पदक प्राप्त गर्दै अन्तिम नवौँ भएको छ ।

करातेमा १२ मध्ये महाकाली नगरपालिकाले ११ र शैल्यशिखरले १ स्वर्ण पदक प्राप्त गरेको थियो । छात्रछात्रा भलिबलमा मार्मा गाउँपालिका प्रथम, एथलेटिक्समा मालिकार्जुन गाउँपालिका प्रथम र कबड्डी छात्रछात्रामा महाकाली नगरपालिका प्रथम स्थान प्राप्त गर्न सफल भएको छ ।

छ दिनसम्म सञ्चालन भएको खेल सम्पन्न गर्न सहयोग गर्ने सबैलाई आयोजक जिल्ला खेलकुद समिति, दार्चुलाले धन्यबाद ज्ञापन गरेको छ ।

भिडियो हेर्न यहाँ क्लिक गर्नुहोस