दार्चुला । दार्चुलाको नौगाड गाउँपालिकाका विभिन्न चार वडामा नयाँ उद्यमी सिर्जना गर्ने कार्य भइरहेको छ । लघु उद्यम विकास शाखाबाट गाउँपालिकाको वडा नम्बर १, २, ३ र ४ मा नयाँ उद्यमी सिर्जना गर्न लागिएको हो ।
उद्यम विकास शाखाको आयोजनामा गाउँपालिका सबै वडामा गरिबी निवारणका लागि लघु उद्यम विकास तालिम प्रदान गरिदै छ । चालु आर्थिक वर्षमा गाउँपालिकाभरी ८० जना नयाँ उद्यमीहरु सिर्जना गर्ने लक्ष्य रहेको नौगाडबाट रेडियो लोकदर्पण समाचारबाट प्रकाशसिंह ठगुन्नाले जानकारी दिनुभयो ।
नौगाड गाउँपालिका वडा नम्बर १ मा अल्लो प्रशोधन तथा बुनाई सीप विकास तालिम अन्तरगत १९ जना महिलाहरुका लागि सीप विकास तालिम सञ्चालनको क्रममा छ । वडा नम्बर २ मा २१ जना उद्यमीहरुका लागि १५ दिने व्यवसायिक तरकारी खेती सीप विकास तालिम सञ्चालनमा रहेको छ । वडा नम्बर ३ मा १२ जना र वडा नम्बर ४ मा ९ जना गरी २१ जना उद्यमीहरुका लागि १५ दिने व्यवसायिक कुखुरा पालन सीप विकास तालिम सञ्चालनमा रहेको ठगुन्नाले बताउनुभयो ।
वडा नम्बर ३ मा ८ जना वडा नम्बर ४ मा १२ जना गरी २० जनाका लागि होजियारी बुनाई सीप विकास तालिम दिन लागिएको छ । वडा नम्बर ३ मा तालिम सुरु भइसकेको छ भने वडा नम्बर ४ मा चैत्र २२ गते (आइतबारदेखि) सञ्चालन गर्ने तयारी रहेको गाउँपालिकाले जनाएको छ ।
वडा नम्बर ४, ५ र ६ मा पुराना उद्यमीहरुलाई स्तरोन्नती गर्ने कार्यक्रम रहेको छ । चालु आर्थिक वर्षमा गाउँपालिकाका तीन वटा वडाका ४० जना पुराना उद्यमीहरुलाई स्तरोन्नती गर्न लागिएको उद्यम विकास शाखाले जनाएको छ । स्तरोन्नती तर्फ हालसम्म ४३ जना पुराना उद्यमीहरुको आवश्यकता पहिचान गरिएको उहाँले बताउनुभयो ।
सीप सिकेका सबैले उद्यम गर्न सके स्वरोजगारी बृद्धि हुने भएकोले गाउँपालिकाले उद्यमी सिर्जना तथा स्तरोन्नतीलाई प्राथमिकतामा राखेको गाउँपालिका अध्यक्ष प्रेमसिंह धामीले बताउनुभयो ।
यो खबर पढेर तपाईलाई कस्तो महसुस भयो ?
भर्खरै प्रकाशित
प्रतिक्रिया