दार्चुला । बुधबार बेलुकी परेको असिनापानीका कारण दार्चुलाका विभिन्न गाउँमा तरकारी बालि र फलफुल खेतीमा क्षती भएको छ । असिनापानीको कारण तरकारी, फलफुल र कृषि बालीमा व्यापक क्षती भएको कृषकहरुले जानकारी दिएका छन् ।
असिनापानीको कारण कृषि बालीमा व्यापक क्षती भएको मिलमिलिका स्थानीय रमेशराज बिष्टले बताउनुभयो । यस्तै अमतोलीका स्थानीय रामदत्त पन्तका अनुसार असिनापानी र ढलको पानीका कारण तरकारीखेतीमा व्यापक क्षती भएको छ । अमतोलीमा माथिबाट आएको ढल अर्थात भलका कारण तरकारीका साथै पानीको धारा र शौचालयमा क्षती भएको उहाँले बताउनुभयो ।
शैल्यशिखर नगरपालिका, लेकम गाउँपालिका सहित जिल्लाका विभिन्न स्थानीय तहमा असिनापानीका कारण तरकारी खेतीमा क्षती पुगेको कृषकहरुको गुनासो छ । भित्याउने बेला भएको तरकारी, फुल्न लागेको सन्तोला, आप, मौसमी लगायत फलफुल र उम्रिनै लागेको मकै खेतीमा व्यापक क्षती भएको लेकमका कृषक धनन्जय जोशीले बताउनुभयो ।
विभिन्न ठाउँमा गरी लाखौँको कृषि बाली क्षती भएकोले स्थानीय सरकारले राहतको व्यवस्था गर्नुपर्ने कृषकहरुको माग छ ।
तस्बिर : रमेशराज बिष्टको फेसबुकबाट
विगत ११ बर्षदेखि पत्रकारितामा सक्रिय लोकदर्पण मिडियाका संस्थापक/सञ्चालक लोकेन्द्र प्रसाद जोशी सामाजिक, आर्थिक, राजनीतिक लगायत समसामयिक विभिन्न विधामा कलम चलाउछन् ।
