दार्चुला । दार्चुलाको अपिहिमाल गाउँपालिका र शैल्यशिखर नगरपालिकाका जनप्रतिनिधि तथा कर्मचारीहरुको लागि योजना तर्जुमा तथा बजेट निर्माण सम्बन्धि तीन दिने क्षमता विकास तालिम सम्पन्न भएको छ ।
सुदूरपश्चिम प्रदेश अनुसन्धान तथा प्रशिक्षण प्रतिष्ठान (पुन्ना) डोटीको आयोजना तथा सुदूरपश्चिम विश्वविद्यालयको सहजिकरणमा दुबै स्थानीय तहका शाखागत कर्मचारी, वडा अध्यक्षहरुलाई बैशाख २५,२६ र २७ गते तीन दिन तथा स्थानीय तह प्रमुख, उप–प्रमुख,प्रशासकीय अधिकृतहरु एंव प्रतिनिधिहरुलाई बैशाख २७ गते प्रशिक्षण गराइएको शैल्यशिखर नगरपालिकाका प्रमुख प्रशासकीय अधिकृत शुरेन्द्र बहादुर बिष्टले जानकारी दिनुभयो ।
बैशाख २५ गतेबाट महाकाली नगरपालिकाको सभाहलमा आयोजना गरिएको क्षमता विकास तालिम शनिवार (हिजो) सम्पन्न भएको उहाँले बताउनुभयो ।
कार्यक्रममा दुबै स्थानीय तहका प्रमुख एंव प्रतिनिधिहरु, प्रशासकीय अधिकृतहरु, शाखागत कर्मचारी, वडा अध्यक्षहरु लगायत सरोकारवालाहरुको सहभागिता रहेको थियो । कार्यक्रममा योजना तर्जुमा तथा बजेट निर्माणका बिषय र क्षेत्रका बारेमा छलफल गरिएको उहाँले बताउनुभयो ।
कार्यक्रममा सहभागीहरुलाई प्रदेश अनुसन्धान तथा प्रशिक्षण प्रतिष्ठान (पुन्ना) र सुदूरपश्चिम विश्वविद्यालयका प्रशिक्षकहरुले प्रशिक्षण गराएका थिए ।
यो खबर पढेर तपाईलाई कस्तो महसुस भयो ?
भर्खरै प्रकाशित
प्रतिक्रिया