दार्चुला । जिल्ला प्रहरी कार्यालय दार्चुलाले कोरोना भाइरस रोकथाम सम्बन्धि जनचेतनामुलक र्यालीको आयोजना गरेको छ ।
सोमबार महाकाली नरपालिका वडा नम्बर ४ खलंगास्थित बजार क्षेत्रमा प्रहरी निरीक्षक पुस्कर सिंह ऐरीको नेतृत्वमा खटिएको प्रहरी टोलीले समुदाय प्रहरी साझेदारी कार्यक्रम अन्तर्गत सामाजिक दुरी कायम राखि कोभिड-१९ सम्बन्धि जनचेतनामुलक र्यालीको आयोजना गरिएको जिल्ला प्रहरी कार्यालय दार्चुलाले जनाएको छ ।
तपाईको मास्क खोई, अति आवश्यक काम बाहेक घर बाट बाहिर ननिस्किऔ, मास्क अनिवार्य लगाऔ, बेलाबेलामा साबुन पानीले हात मिचिमिचि सफा गरौं लगायत नारा लेखिएका प्ले कार्ड बोकी र्यालीको आयोजना गरिएको हो ।
र्यालीमा जनचेतनामुलक सन्देशका साथै मास्क समेत वितरण गरिएको प्रहरीले जनाएको छ ।
यसैबिच दोस्रो लहरको कोरोना भाइरसको संक्रमण फैलिन थालेपछि नेपाल भारत सीमा नाकामा कडाइ गरिने भएको छ । भारतले धार्चुला प्रवेशमा तीन दिन भित्रको पीसीआर रिपोर्ट अनिवार्य गरेपछि कोभिड संकट व्यवस्थापन केन्द्र दार्चुलाको बैठकले समेत सीमा नाकामा थप कडाई गर्ने निर्णय गरेको छ ।
दार्चुलाका प्रमुख जिल्ला अधिकारी सिद्धराज जोशीको अध्यक्षतामा बसेको बैठकले भारतबाट नेपाल भित्रिनेहरुलाई कोरोना विरुद्धको दुई वटा खोप लगाएको हुनुपर्ने वा पीसीआर रिपोर्ट साथमा हुनुपर्ने निर्णय गरेको जिल्ला प्रशासन कार्यालय दार्चुलाले जनाएको छ । खोप लगाएको प्रमाण वा पीसीआर रिपोर्ट नभएका भारतीयलाई नेपाल प्रवेशमा रोक लगाउने निर्णय गरिएको हो ।
बैठकले भारत जाने नेपालीहरुको अत्यावश्यक काम परेमा स्थानीय तहको सिफारिस अथवा विरामीको हकमा जिल्ला अस्पतालको सिफारिस चाहिने निर्णय गरेको छ । विवाह वा मृत्यु भएको खण्डमा स्थानीय तहको सिफारिसको आधारमा एन्टिजेन परीक्षण गरेर भारत जान दिइने प्रमुख जिल्ला अधिकारी शिद्धराज जोशीले बताउनुभयो ।
आइतबार बसेको जिल्ला कोभिड १९ संकट व्यवस्थापन केन्द्रको बैठकले जिल्लाभरीका स्थानीय तहहरुलाई पुनः आइसोलेसन व्याड तयारी अवस्थामा राख्न आग्रह गरेको छ । गत वर्ष जिल्लास्थित स्थानीय तहले सञ्चालनमा ल्याएका आइसोलेसन पुनः सञ्चालनमा ल्याउन आग्रह गर्ने निर्णय भएको हो ।
नेपाल सरकार गृह मन्त्रालयको बैशाख ११ गतेको पत्रबाट आइसोलेसन केन्द्र सञ्चालनको व्यवस्था मिलाउन जिल्ला संकट व्यवस्थापन केन्द्रलाई पत्रचार भएको थियो । बैठकले गत वर्ष सञ्चालित आइसोलेसन पुनः व्यवस्थापन गरी तत्कालै सञ्चालनमा ल्याउन आग्रह गरेको प्रमुख जिल्ला अधिकारी जोशीले बताउनुभयो ।
गत वर्ष जिल्लाका सबै स्थानीय तहले विद्यालयहरुलाई आइसोलेसनको रुपमा प्रयोग गरेका थिए । अहिले विद्यालयहरु सञ्चालनमा रहेका छन् । विद्यालय बन्द नहुने अवस्थामा आइसोलेसनका लागि विकल्प खोज्नुपर्ने देखिएको छ ।
भारतको धारचुला तहशिलले समेत नेपाल–भारत जोड्ने झोलुङ्गे पुलमा आवतजावत गर्ने व्याक्तिको तीन दिन भित्रको कोरोना नभएको प्रमाणित हुने रिपोर्ट अनिवार्य गरेको छ ।
यो पनि पढ्नुहोस : दार्चुलाको सीमामा कडाइ, सबै पालिकामा आइसोलेसन सञ्चालन गर्न आग्रह
यो पनि पढ्नुहोस : पछिल्लो २४ घण्टामा तीन हजारभन्दा धेरैमा सङ्क्रमण, २८ जनाको मृत्यु
यो पनि पढ्नुहोस : सबै परीक्षा स्थगित गर्न सीसीएमसीको सिफारिस
यो पनि पढ्नुहोस : पहाडमा २०० र शहरमा ५०० सक्रिय संक्रमित भए निषेधाज्ञा
यो खबर पढेर तपाईलाई कस्तो महसुस भयो ?
भर्खरै प्रकाशित
प्रतिक्रिया